Sufeton rundunar ‘yansanda ta kasa Usman Alkali Baba, Ya bada umarnin tantance kwazon jami’an rundunar dake aikin bada hannu akan titina da kula da zirga-zirgar ababen hawa, domin yi masu karin girma zuwa matsayi na gaba.
Wata sanarwa da kakakin rundunar, CSP Olumiyiwa Adejobi ya fitar a jiya, Ta ce aikin tantacewar wani bangare ne na yiwa jami’an karin girma.
Ya ce sufeton yansandan na kasa ya bada umarnin daga likafar jami’an yansandan masu aikin bada hannu da suka dace bisa la’akari da kwazonsu wajen aiki, da kuma shaidar karatu da suke da shi, zuwa matsayi na gaba.
Kakakin ‘yansandan na kasa, Ya ce wannan wani bangare ne na kokarin da rundunar ta take na samarwa da jami’an ta cigaban da ake bukata.