A yanzu haka ana cikin zaman zullumi a reshen jam’iyyar PDP ta nan jihar Kano kan abunda zai iya kasancewa, a yayin da a yau ne kotun daukaka kara zata yanke hukunci kan wane ne halastaccen dan takarar gwamnan jihar kano, a karkashin jam’iyyar tsakanin Mohammed Sani Abacha da Kuma Sadiq Aminu Wali.
Idan ba’a manta ba a baya, wata babbar kotun taraiyya ta baiyana zaben fidda dan takarar gwamnan jihar Kano a jam’iyyar ta PDP da aka gudanar a Lugard, wanda Mohammed Abacha ya samu nasara a matsayin halastacce, a yayin da ta yi fatali da zaben fidda gwani na jam’iyyar da aka yi a cibiyar koyar da matasa sana’oi ta Sani Abacha dake nan Kano.
Sai dai saboda rashin amincewa da yadda hukuncin ya kasance, Sadiq Aminu Wali wanda ya kasance dan tsohon ministan harkokin wajen kasar nan, Aminu Wali ya garzaya kotun daukaka kara, inda yake neman ta bi masa hakkinsa.