Hukumar tsaro ta farin kaya (DSS) ta tabbatar da cewar wasu manyan yan siyasa da bata baiyana sunayensu ba, sunyi yunkurin kafa gwamnatin rikon kwarya a Najeriya, inda ta bayyana shirin a matsayin wanda bai dace ba.
A cewar hukumar, shirin zai gurgunta mulkin farar hula tare da jefa kasar nan cikin wani mawuyacin hali.
Bayanin hakan na kunshe ne cikin wata sanarwa da kakakin hukumar, Peter Afunanya ya fitar ranar Laraba.
Hukumar ta DSS ta yi kakkausan gargadi ga masu shirin dakile tsarin dimokuradiyya a kasar nan da su gaggauta janye makarkashiyar da suke yi ko kuma su fuskanci fushin hukuma.