Hukumar kula da ingancin abinci da magunguna ta kasa NAFDAC taja kunnen jama’a dasu yi hattara kan wasu mayukan canza launin fata dake yawo a kasuwanni, wanda ta baiyana da cewar zasu iya haddasa samun barkewar wata annoba.
Hukumar ya baiyana haka ne a yayin wani taron karawa juna sani da ta shirya kan illolin yin amfani da mayukan canza launin fata, wanda aka gabatar a Fatakwal babban birnin jihar Ribas.
Shugabar hukumar, Farfesa Mojisola Adeyeye ta koka kan illolin dake tattare da yin amfani da irin wadannan mayuka ,inda ta bukaci matan kasar nan dasu kasance masu tinkaho da ainihin launinsu na fata da suke dashi.