‘Dan takarar shugabancin kasar nan a karkashin jam’iyyar Labour, Peter Obi, Ya bukaci ‘yan Najeriya dasu rika karbar kudin da ‘yan siyasa ke basu , kasancewar dama tun asali kudinsu ne, amma kuma kada su zabe su a lokacin zabe.
Peter Obi ya yi wannan roko ne, a yayin gangamin yakin neman zabensa shida da mataimakinsa, Datti Baba Ahmed, a Ilorin babban birnin jihar Kwara.
Ya kara da cewa, ba ya son Najeriya ta kasance a hannun mutanen da a lokacinsu a ke samu Macizai suna hadiye kudi, a saboda haka ya kamata al’ummar kasa su dauki matakin da ya dace a wannan lokaci.
A cewar Peter Obi, gwamnatinsa shida da Baba Ahmed zata samar da kyakykyawan yanayi ga matasa, a saboda haka ne ma ya bukace su da su yi kyakykyawan shiri a zaben mai zuwa.