A wani mataki na samun sauki a bangaren sufuri a kasar nan, Shugaban kasa Bola Tinubu na hasashen mayar da litar man gas naira 250, domin ganin ya maye gurbin Man fetir da ake amfani da shi, bayan dakatar da biyan tiriliyoyin kudi a matsayin tallafin mai da gwamnati ta yi.
Mai magana da yawun shugaban kasa Ajuri Ngelale ya ce matakin wani bangare ne na shirin komawa yin amfani da Gas.
Ya ce shirin wanda ke karkashin shugaban ma’aikatan fadar shugaban kasa, Femi Gbajabiamila, Zai samar da sabbin motoci dubu 11 da 500 masu amfani da Gas a nan kusa, domin samar da tsarin sufuri mai rahusa a dukkanin jihohin kasar nan.
Kazalika ya ce matakin zai temaka wajen kawo sauki kan litar man fetir da ake siya har naira 620.