Jigo a jam’iyyar NNPP, Buba Galadima, Ya yi kira ga shugaban kasa Bola Tinubu da ya sauke shugaban hukumar zabe ta kasa mai zaman kanta, Farfesa Mahmood Yakubu daga kan kujerarsa, sakamakon zarginsa da kasa yin abunda ‘yan Najeriya suka yi tsammanin gani a zaben da ya gabata.
A hirarsa da gidan Talabijin na Channels, Ya ce girman lefin da shugaban hukumar zabe ta Farfesa Mahmood Yakubu ya aikata ya fi girman zunubin da dakataccen gwamnan babban bankin kasa,Godwin Emefiele ya yi.
Ana dai cigaba da sukar hukumar zaben ta kasa kan kin dora sakamakon zabe akan rumbun tattara sakamakon zaben ta dake kan internet kamar yadda ta yi alkawari, Koda ya ke hukumar ta alakanta faruwar matsalar da tangarda ta na’ura da aka samu.
Idan ba’a manta ba suma tawagar jami’an sanya ido kan zaben da aka yi kasar nan, daga kungiyar taraiyyar turai, Sunce amannar da jama’a ke da ita kan hukumar zabe ta kasa, ta gamu da babbar tawaya.