Ministar harkokin jin kai da rage radadin talauci Betta Edu ta ce gwamnatin tarayya za ta kaddamar da shirin bayar da tallafin kudi ga gidaje miliyan 15 a mako mai zuwa ranar Talata 17 ga watan Oktoba.
Edu ta tabbatar da haka a daren jiya ta cikin wani shirin gidan talabijin, watanni bayan gwamnatin tarayya ta dakatar da biyan tallafin man fetur.
Ministar ta ce ana saran samun amincewa daga shugaban kasa kan shirin a cikin wannan mako da kuma kaddamar da shirin a hukumance a mako mai zuwa.
A cewarta, ma’aikatar tana aiki tare da masu ruwa da tsaki a fadin kasarnan domin samun rijista mai sahihanci ta wadanda za su amfana domin tabbatar da cewa wadanda ke cikin rijistar ‘yan Najeriya ne da ke samun abunda ya gaza dala 1.95 a kowacce rana.