Bayanan da aka samu kan abubuwan da suka shafi annobar sarkewar numfashi ta Korona, daga cibiyar dakile yaduwar cututtuka ta kasa NCDC, Sun baiyana cewa an samu karuwar masu harbuwa da cutar a cikin wata daya a kasar nan da kimanin kaso 324 bisa 100.
Daga ranar 12 ga watan Mayun bana zuwa 12 ga watan Yunin da ya gabata, an samu mutane 568 da suka kamu da cutar, Bugu da kari, daga ranar 13 ga watan jiya zuwa 12 ga watan da muke ciki, an samu mutane Dubu 2 da 407 da suka kamu da cutar, wanda hakan ya nuna cewar an samu karuwar kaso 323 da digo 76 bisa 100 na yawan wadanda suka harbu da cutar a kasar nan.
A cikin wani sakon jan kunne da Cibiyar ta fitar gabanin Hutun Babbar Sallah, Ta alamtar da yuyuwar samun barkewar annobar korona a karo na biyar a kasar nan.
Ya zuwa wannan lokaci tun bayan barkewar cutar a shekarar 2020, Mutane Dubu 258 da 874 ne suka harbu da cutar, Yayin da aka sallami Dubu 250 da 456, Sannan kuma Dubu 3 da 144 suka rasa rayukansu a sakamakon annobar.